[香港/觀塘] 超人氣平靚正點心 豪隍點心工房

推薦：🍉🍉🍉🍉🍉 (5/5)             味道：🍉🍉🍉🍉🍉  (5/5)          

價錢：🍉🍉🍉🍉 (4/5)                   打卡：🍉🍉  (2/5)                      

位置：🍉🍉🍉🍉(4/5)                    回訪：🍉🍉🍉🍉🍉 (5/5)      

前排想同朋友去食點心，想搵間未試過嘅餐廳試吓， 搵搵吓見到有人share呢間啲蝦餃拳頭咁大粒，於是即日就book咗位試吓係咪真係有咁大粒蝦餃，同埋好唔好食😂

鮮蝦腐皮卷 $28 🍉🍉🍉🍉

一咬落去就咬到有西芥令腐皮卷好有咬口，外皮好脆，食到淡淡嘅豆香，內面嘅蝦細粒但係好彈牙同嫩滑，外脆內軟😋

鵝肝醬咸水角 $25 🍉🍉🍉

鵝肝醬味唔太出，同一般嘅咸水角差唔多，都好食嘅，只係無預期咁特別

五香金錢肚 $34 🍉🍉🍉🍉🍉

個人嚟講好鐘意，一嚟本身自己好鐘意食金錢肚，二嚟佢整得濃味但唔鹹，醬汁味道控制得好好，而且金錢肚煙韌得嚟唔會難咬到好似橡筋咁，係暫時食過最好食嘅金錢肚

蝦餃 (2粒) $25 🍉🍉🍉

呢間嘅蝦餃皮唔薄，但好煙韌，有另一種食感，內餡嘅蝦超彈牙，入面係連蔥都無，滿滿的都係蝦，超飽實&足料!! 不過好可惜嘅係咁啱我食個嚿一夾起就望到入面有蝦腸，咬到最尾仲有片蝦殼，呢度扣咗少少分😭

醬汁茄子拼尖椒 (各2件) $30 🍉🍉🍉🍉

呢碟一嚟到已經望到呆咗，心諗茄子同尖椒會唔會太大件😂😂一件等於平時煎釀三寶2件咁大嚿，嚿茄子一咬開啲汁爆哂出嚟 (所以攤凍少少先好食呀)，超Juicy，微辣，中間個芯非常軟綿綿，係茄子皮有少少難咬開，釀埋一齊嘅魚肉亦都好足料，釀得勁厚，唔霉，感覺上溝粉溝得唔算多

豉汁蒸鳳爪 $25 🍉🍉

好辣，辣到條脷有啲痛，食唔到第二嚿🥵

山竹牛肉球 $23 🍉🍉

呢個麻麻哋，好粉，馬蹄唔多

蝦仁燒賣皇 (2粒) $25 🍉🍉🍉🍉🍉

望落隻蝦好細隻係因為個豬肉餡真係好大嚿，超足料，食一粒都已經好飽😂😂咬開入面有微微豬肉香，肉餡好實淨好正😋

後記

💟 聽講呢間長期都好多人排隊，建議大家預先訂枱，當日我哋因為提早book咗位，所以人齊就直接入得去食，完全唔洗等😋

💟 加埋幾個無影相嘅點心，食咗咁多先係$400(茶芥每位6蚊)，飽到捧住個肚走，都算抵食!😂😂

📍 豪隍點心工房

地址：觀塘敬業街65-67號敬運工業大廈1樓A室