[香港/旺角] 食日本嘢嘅「日本野」

推薦：🍉🍉🍉             味道：🍉🍉🍉            價錢：🍉🍉🍉

打卡：🍉🍉🍉             回訪：🍉🍉🍉

最近見呢間餐廳都幾受歡迎，又見到食物款式好多，有刺身、壽司、大阪燒、串燒、石燒牛、壽喜燒等，岩哂想一次過食唔同日本料理嘅朋友(我)😋於是又走咗去食日本嘢😆😆

石燒吉列霜降牛小排 $178 (晚餐定食價，配日本飯&溫泉蛋/溏心蛋)

牛肉份量多嘅，不過好考牙力，每件都要咬好耐先食到，其實算係正常水準，但係秘嘅石燒吉列牛實在太出色，相比之下就會覺得無咁好食🙈另外一提，餐廳無提供一嚿油用嚟燒熱塊石，我哋自己用咗壽喜燒塊和牛旁邊少少肥膏😂

溏心蛋好輕微過熟，不過可以接受

和牛壽喜燒 $188 (可選配飯/烏冬) 

一嚟到見到2塊和牛舖係鍋面，覺得好吸引之外，仲會覺得有啲可惜，牛嘅油脂唔係好夠，同埋得2塊😢底下材料都足料，不過個鍋太細而湯太多，一路食一路擔心會滾瀉，呢個情況見幾枱有叫壽喜燒嘅食客都有呢個反應(最後拎咗個碗勺走咗一大碗湯先無事)

以份量嚟講，呢個價錢都OK，淨係食鍋入面嘅餸已經夠飽，仲有個烏冬/飯跟餐送，但係如果計埋質素就會覺得有少少貴，畢竟市面上$100內食到壽喜燒既餐廳都唔少，去到接近$200嘅價錢，會預期係再好食啲，但係衣家就仲爭少少🙈

追加小食 三文魚刺身(3件) $38

幾厚但係雪味重，$38嚟講唔係好抵🙈

鰻魚玉子燒(3件) $38

同樣係$38，呢個小食就抵好多啦😂 鰻魚份量唔多，不過醬汁都幾香，成嚿玉子燒都會食到有鰻魚汁味，蛋外層微焦而內層嫩滑，鰹魚汁份量恰到好處，唔會太鹹，係最有驚喜嘅餸😋

後記

💟 當日一入座無耐，聽到隔離枱尖叫，原來係有隻大曱甴係個張枱😖😖😖應該係天花板跌落嚟，雖然未必關餐廳事，但係都有少少陰影，全程飯間唔中都會望上天花板望吓😖😖

💟 土地問題，啲枱太細，叫咗一個壽喜燒同石燒牛已經無位放，要即刻飲哂個湯俾店員收走啲碗碟先夠位🙈

📍 日本野

地址：旺角西洋菜南街2A號銀城廣場9樓