[香港/旺角] 人氣高企Black Coffee 食物款式特別又高質

推薦：🍉🍉🍉🍉      味道：🍉🍉🍉🍉             價錢：🍉🍉🍉

打卡：🍉🍉🍉            回訪：🍉🍉🍉

呢間cafe最近好多人介紹，個個都大讚，我都去湊吓熱鬧，睇吓係咪真係咁好食😋😋

Thai Style Chicken Spaghetti $98 🍉🍉🍉

一嚟到就聞到好香泰式香料味, 食落似冬蔭功味，望落細細碟但係都幾大份，雞肉好嫩滑，汁量啱啱好，唔會太濕，好惹味，會想一啖接一啖咁食落去，不過食到後尾都幾辣🔥

Black Forest Souffle Pancake $105 🍉🍉🍉🍉

等咗大約30分鐘先有，不過其他嘢食上得好快，可以食住等，正😆灑喺面頭嘅可可粉食落唔會"choke"喉，多少少都可以，材料有仿傚黑森林蛋糕嘅食感, 有車厘子同朱古力碎，朱古力濃味唔太甜😋個Pancake奶油味同蛋味都幾香, 空氣感同蛋香都無Whitewood 個間咁重，食落比較有質感😆

Buffalo Wings $68 🍉🍉🍉

呢個價錢有5隻雞翼都幾抵，雞翼炸得啱啱好，無血水之餘雞仲有肉汁，不過雞翼唔算大隻，同無乜雞味，汁略嫌唔係好夠😟 (啲伴碟覺得太生無食到)

Latte (hot) $38 🍉🍉

雖然係cafe，但係無hand drip coffee，同埋餐廳冷氣太凍唔想飲cold brew，最後都係飲番Latte🙈咖啡無得選擇要咩豆，飲落nutty，比起嘢食，杯咖啡比較普通，奶泡打得幾滑但係body同aftertaste都係爭少少😟

Shaken Iced White Peach Tea $46 🍉🍉🍉

呢杯嘢飲就普普通通，桃味同茶味相若，聞落無白桃個隻香味，不過唔係糖水味同唔甜，食完啲重味嘅嘢食之後飲落好清新😆

後記

💟 同樣係sell黑色概念，比較之下#000000 嘅設計就比較有特色，加上有用餐時間90分鐘限制，氣氛上就無咁放鬆，快手快腳叫完嘢食食完就差唔多夠時間埋單

💟 限聚令加上餐廳有客人上限，等嘅時間會比較長，當日我哋等咗45分鐘左右，如果再去都會等到無咁多人排隊先再去啦

💟 到訪當日餐廳凍氣開得幾大，坐咗15分鐘就開始覺得好凍，同埋嘢食嘢飲都好快凍哂，如果各位想去試就可能要帶定件薄褸去啦

📍 Black Coffee

地址：旺角廣華街3號地下3號舖