[香港/荃灣] 米線關注組大熱之一 雲家小鍋米線

推薦：🍉🍉🍉🍉            味道：🍉🍉🍉🍉            價錢：🍉🍉🍉🍉

打卡：🍉🍉                       回訪：🍉🍉🍉🍉

自從入咗米線關注組之後日日都好想食米線，腸胃炎未好番哂都忍唔住去咗荃灣食雲家，食咗之後竟然奇蹟康復埋😂 (請勿模仿😀)

酸辣小鍋米線 (中辣，配螺旋草、豬頸肉、腩肉) $60 🍉🍉🍉🍉  

聽講中辣係坊間小辣程度，所以平時食開小辣嘅我都叫咗中辣嚟試，真係唔算好辣，幾啱我，如果叫小辣應該會覺得唔夠辣，淨係飲湯會辣辣哋，但係唔會辣到流哂鼻水，酸度適中，但係鹹酸菜唔算多，切得偏細粒，我個人鐘意再酸多少少/咸酸菜多啲😛最大嘅特點就係佢個湯底唔油，無咁大罪疚感😂

米線偏硬，每啖都要咬幾吓，幾乎係唔熟嘅邊緣，唔知係舖頭嘅特色定係因為太多客人啦🙈螺旋草同雲川嘅唔同，細細片，份量好多，好香好淋，夾住麵食一流😋豬頸肉份量都幾多，叫咗3個餸都唔會話得2,3片豬頸肉，食落有少少柴不過我覺得OK接受到，肉邊浸咗湯都仲脆，呢個有少少驚喜!😆因為menu寫腩肉係限量，所以平時唔會叫腩肉嘅我都叫咗嚟試吓，肉質偏瘦，肥膏唔多，對我嚟講係啱啱好幾正，但係可能食開腩肉嘅人會覺得唔夠肥同淋，腩肉唔太辣，望落咁深色同咁多辣椒但係其實唔會好鹹同辣，寫寫吓又開始肚餓😭

涼拌墨魚頭(小食) $42 🍉🍉🍉🍉🍉  

呢碟墨魚頭真係超彈牙，彈牙到我一路食一路驚咬親自己啲牙肉，一食落口好香蒜蓉味，蒜蓉份量足夠，每嚿都可以有蒜蓉一齊夾住食，醬汁酸酸哋，好開胃，同墨魚頭&蒜蓉都好夾，

當日夜晚8點去到已經賣哂墨魚頭同豬頸肉，如果想試啲熱門餸菜嘅朋友就要早少少去食啦😂

後記

💟 小店經營，舖面得兩個人幫忙，但係客人又多，外賣又多，喺呢啲時候做生意真係好難，希望各位食客互相忍讓吓，多啲鼓勵少啲鬧姐姐🙈

💟 到訪當時聽到如果外賣要分湯要等耐啲，如果大家叫外賣就要留意吓啦

📍 雲家小鍋米線

地址：荃灣沙咀道328號328廣場地下G01舖 (寶石大廈地下)