前排腸胃炎咩都唔食得，每日淨係飲電解質飲品、蘋果汁同食藥，有一日咁啱去屯門，就決定去我好耐無去嘅隱啡食吓comfort food獎勵吓自己😭 

Oolong Tea Scone (with passion fruit jam) $28 🍉🍉🍉🍉🍉

我個人嘅食法係鐘意咬一啖個外層，之後先再搽果醬係中間食，外層脆得嚟入面又好鬆軟，重奶香，配埋微微嘅烏龍茶味好夾😆個passion fruit jam嘅酸甜適中，就咁試會覺得有少少酸，但係夾埋Scone嚟食其實啱啱好，好開胃😋😋呢個果醬基本上係我腸胃炎個個星期第一次食到酸嘅嘢食，個吓真係好療癒😭

2-3年前第一次去隱啡，係因為見到佢簡介寫「希望遠離競爭，喺隱世嘅地方做咖啡」，當時自己有好多煩惱，有種想匿入深山隱世生活嘅想法，見到呢個簡介好心動，想去試吓係咪真係感受到隱世嘅感覺，個陣連精品咖啡係咩都唔係好知，去到叫咗杯咖啡，坐係度等嘅時間，覺得自己個心靜咗落嚟期待呢杯咖啡，暫時忘記咗自己啲煩惱💭後來先知，原來飲一杯咖啡都有咁多學問，之後就算無時間坐低飲/要兜路，都會間唔中去買杯嘢飲，起碼喺享受呢一杯咖啡嘅時間，可以放鬆一吓心情🙆

其實到訪當日都有叫咖啡飲，但係當時食緊藥點都有少少影響，就無謂喺度亂咁評論咖啡啦🙈 (不過都極度推介大家要去試)

至於點解會俾「打卡」3粒星，其實唔係唔適合打卡，而係小店位置唔多，希望大家都真係去品嘗佢嘅出品而唔好淨係為咗打卡先去啦🙈

後記

💟 我去咗咁多次都仲未食到個菠蘿蛋糕😭😭

💟 店內有個小角落賣咖啡用品/Drip Bag等，Drip Bag有幾款，都好值得大家試! (可以上佢哋Facebook/MeWe睇吓每個月係咩豆)