相隔幾個月終於開番夜市堂食，係時候去試啲適合夜晚係餐廳食嘅菜式啦! 西班牙菜好少餐廳會有外賣，就算有，質素都未必好好，呢間La Postre主打西班牙菜，到訪當晚食咗好多海鮮，質素都唔錯，價錢以西班牙餐廳嚟講都算幾平民!

Tapas $138 (轉小食+$15+$28)

Tapas類似小食拼盤，有3類小食可以選擇，如果要轉另外2類嘅小食就要逐款加$15/$28，因為唔洗加錢個類小食覺得無咩想食，就唯有加錢轉咗2款小食

西班牙蛋餅 🍉🍉

切開望落，同食落都好似菜甫肉碎炒蛋，不過可能因為另外兩款小食好濃味，相比之下呢款好似無乜味咁

青檸香辣凍蜆 (+$15) 🍉🍉🍉🍉

唔會太酸，微辣，不過份量好少😭 蜆都幾肥滿，有鮮味，食落咁多隻都無沙

奇利西亞章魚伴薯蓉 (+$28)  🍉🍉🍉

薯蓉好足料，應該係用真薯仔磨成，唔係開粉，不過碟邊個啲有少少油，而章魚好淋，唔彈牙，香料(黑椒)大粒到會「zip」牙，無雪味，唔似平時食開嘅章魚味道

西班牙海鮮飯 $168 (單點) 🍉🍉🍉🍉

外觀非常吸引，食落都唔錯，飯應該有用蝦頭煮嘅湯煲成，有微微蝦嘅鮮味，海鮮全部都好正，好飽滿，唔會韌，而且無雪味，呢個價錢食到呢個質素都算收貨!! 食落辣辣哋好惹味，好濃，食到最後會覺得有啲啲重口味，不過都正常嘅，如果有檸檬片/青檸片就更好啦

抹茶麻糬窩夫 $108 Full ($98 Half) 🍉🍉🍉🍉

伴碟有楓糖漿、吉士、紅豆蓉、抹茶雪糕同綠茶醬，麻糬比較似係Brownie，咬身不過一咬即散，都算鬆軟👍窩夫烤得好香脆，中間有綠茶餡，其實都算好食但係都係無一糖咁香 (係一糖實在太出色)🙈🙈 抹茶雪糕有甘味，係抹茶鮮奶(matcha latte)個種味而唔係純綠茶味，好香好岩我口味😍😍不過唯一小奇怪嘅係綠茶醬，食落有少少似壞咗，希望我唔係又中伏🙈🙈

桂花荔枝茶 $43 🍉🍉🍉

法式焦糖燉蛋 (做問卷送) 🍉🍉🍉

焦糖厚度啱啱好，唔會好似咬玻璃咁咬極都咬唔碎/刮損口，蛋漿唔算香同埋有少少淋，實多少少會好食啲😋

後記

💟 可登記資料

💟 職員唔算好多，但係全部都非常nice