[香港/銅鑼灣] 配料出色 超濃湯底蕃茄麵 蕃茄仔

推薦：🍉🍉🍉🍉        味道：🍉🍉🍉🍉             價錢：🍉🍉🍉 

打卡：🍉🍉                   回訪：🍉🍉🍉🍉   

因為當日想喺銅鑼灣食啲唔係連鎖同埋唔辣嘅麵店，搵吓搵吓就搵到呢間舖頭，當時去到1點左右，蕃茄清湯冷麵已經賣哂😭雖然我哋前面排得3枱，但係因為店舖入面坐位唔多，都等咗45分鐘先有位🙈

炭烤風味雞排鮮茄濃湯刀削麵 $62 🍉🍉🍉🍉  

超濃蕃茄湯底，濃到唔似湯，似係蕃茄蓉底😂😂飲落好足料，無乜味精味，完全唔酸，食到啲好細粒好細粒嘅骨碎，感受到個湯底用咗幾多心機去整，忍唔住係咁一羹一羹咁勺嚟飲︿啱哂我呢啲超鐘意蕃茄嘅人😍😍😍😍

雞排未食已經聞到烤得好香，雞皮烤得好香脆，雞肉好嫩滑，同蕃茄湯底好夾!! 

刀削麵超掛湯，每一啖都可以蕃茄湯同麵一齊食到，不過質地偏厚，要咬幾吓先吞到，會有少少覺得只係啱啱好夠熟，如果薄少少/煮淋多少少就會好好多😋😋

特級安格斯牛肩胛鮮茄濃湯刀削麵 $70 🍉🍉🍉🍉  

牛肩胛嘅牛味超濃郁，一咬已經好香牛味，而且牛肉都幾大塊，唔會好快就食完塊牛淨係食麵😆

玫瑰觀音烏龍比較普通，無乜回甘，玫瑰味偏淡，飲完個湯覺得唔洗點再飲嘢😂

後記

💟我哋去嘅時候非常好彩，前面得3枱等緊位，食完一出嚟之後見到排咗超過10枱! 如果想食嘅朋友真係要預非用餐時間嚟食同早少少嚟排隊啦😂

💟叫餐要scan QR code，見到隔離嘅食客都有遇到技術問題，可能真係有個樓面會好啲啦🙈

💟 土地問題，每張枱都係啱啱好放得落個餐盤，而且枱同枱之間都幾逼，出入要小心啲袋會唔會撞到人/嘢食，加上咁多人排隊，唔係好適合打太耐卡，食完就讓張枱俾下一輪食客啦🙈

📍 蕃茄仔

地址：銅鑼灣希雲街5號地舖