[香港/屯門] 屯市少有適合chill一chill嘅居酒屋 CHI Tachinomi

推薦：🍉🍉🍉            味道：🍉🍉🍉            價錢：🍉🍉🍉

打卡：🍉🍉🍉            回訪：🍉🍉🍉

玉子燒 $28 🍉🍉🍉🍉

咬口好厚實，食落蛋味多過鰹魚汁味，而且無糖味，食到最後一啖覺得有少少鹹

鹽燒牛舌 $48 🍉🍉🍉🍉

一開頭以為得2-3嚿，嚟到見到有4嚿，而且唔係2嚿斬半咁上，比想像中份量多，一咬啲肉汁爆哂出嚟，燒得啱啱好，唔會好韌之餘同個醬汁好夾，不過都係有啲偏鹹

土手燒 $38 🍉🍉🍉

落單個陣店員推介俾我哋，諗住唔知係咩嚟就叫咗嚟試吓，原來係牛腩😂咬落去唔洗用力就可以撕開，一掂去就散開哂，好淋，以牛腩嚟講其實唔係太入味，但係同一餐其他嘢食相比鹹度都算適中，甚至食完其他嘢再食會有少少覺得無味😂

雞蠔肉 $48 🍉🍉🍉🍉

呢個都係店員推介嘅，本身想嗌京蔥雞脾肉，但係叫個陣店員話京蔥雞脾肉得2嚿肉，呢個雞蠔肉 (雞脾對上最嫩嘅肉) 就有4嚿，想食雞肉嘅話叫呢個嘅份量會比較多，於是我哋又被說服叫咗呢個😂雞肉真係超級嫩滑，一咬就爆哂啲肉汁出嚟，比一般雞脾肉細嚿少少，不過都可以接受嘅😋 (不過最大嚿個嚿可能醬汁太多，比其他3嚿鹹)

日本雞皮 $38 🍉🍉🍉

雞皮大約有7塊左右，非常脆，覺得有少少overcooked，似食緊魚皮，灑喺面嘅鹽太多

豬腩葡萄卷 $42 🍉🍉🍉🍉

估唔到真係用豬肉包住粒提子咁燒😂第一啖咬落去粒提子爆汁，差啲辣親，各位如果叫呢個嘅話要小心呀😂提子中和咗豬肉同醬汁嘅鹹味，加埋提子汁嘅甜味，好有驚喜，街外好似比較少見到呢樣

甘栗紫薯餅 $38 🍉🍉🍉🍉

唔鹹啦終於😂😂😂炸衣好薄，好脆，上碟後隻碟唔會留有太多油，栗子同紫薯打成蓉個味道比例大約係3:7，起碼唔會食唔到栗子味先，如果食到少少栗子粒就更好啦😍

飯糰 $42 🍉🍉🍉

一開頭睇Menu見到，心諗咩飯糰要40幾蚊一份，為咗滿足心就叫嚟試吓伏，嚟到見到2大嚿，有紫菜飯素同木魚係面燒過，心理平衡番少少😂😂外層燒過之後質感硬而不脆，唔似飯焦，內層嘅飯無材料，就咁食緊白飯，無味咁，個對比好大

同朋友都一致認為，如果覺得食完串燒都唔飽就可以叫呢樣嚟塞飽自己😂😂

後記

💟 可以網上book位 (chichichi.com.hk)，用餐時間75分鐘

💟 當日叫咗2罐酒，好似唔同時候會有唔同嘅罐裝酒，記得問清楚店員啦~

💟 店員超級有禮貌，以為係日本留學番嚟，好禮貌到有少少唔好意思😂

💟 可能因為要送酒，所有嘢都偏鹹咗少少，如果可以淡番少少就好啦😋

📍 CHI Tachinomi

地址：屯門屯順街1號屯門市廣場一期地下G073號舖 

(地下中銀及匯豐對面馬路，舊許留山)