[香港/太子] 夠酸可更辣酸辣米線 貴香園

推薦：🍉🍉🍉            味道：🍉🍉🍉            價錢：🍉🍉🍉🍉

打卡：🍉🍉🍉            回訪：🍉🍉🍉

雲南小鍋米線 (小辣/走茜多酸/加腐皮角 $12 &牛肚 $8) $48 🍉🍉🍉🍉

呢碗米線叫咗多酸，因為我個人偏好湯底酸少少，所以覺得個湯底加咗酸之後個酸度係啱啱好，好正！不過加咗酸都係得好少酸菜，淨係搵到幾嚿😢 湯底比較甜，對我嚟講唔算辣 (平時譚仔都係食開小辣)，下次再嚟嘅話可以試吓中辣😋米線份量非常多，配菜肉碎有少少五香味，不過偏肥少少，會食到肥膏😬

牛肚每件厚薄不一，食到啲滷水味但係同碗米線唔係好夾，如果麻辣牛肚就更惹味啦😆腐皮角係一嚿長方形切開2嚿個款，唔係三個角都炸哂個隻，要加$12，但係只有4嚿左右，餸嘅份量真係唔多😢

貴香園涼皮 (小辣/加豬頸肉 $15) $46 🍉🍉

選擇豬頸肉要加$15，但係嚟到發現一碗得3嚿，好唔抵😢😢而且食落有少少韌，有啲失望🙈因為無乜餸，所以碗涼皮嚟到嘅時候個賣相麻麻，望落好多油，但其實一啲都唔辣😮涼皮唔似重慶酸辣涼皮透白色個種，似闊薯粉，食落煙韌有咬口，又掛湯，份量都算可以飽肚，不過闊薯粉有一個大嘅缺點就係非常容易彈到周圍都係，特別喺件衫上面😭

蒜泥白肉 $28 🍉🍉🍉🍉

一嚟到已經聞到麻辣油好香，食落微微感受到麻嘅感覺，不過唔太辣，如果辣啲同多啲蒜蓉就仲正😋衣家食落似紅油白肉多過蒜泥白肉😂😂白肉半肥瘦適中，食勻成碟都無軟骨😆

後記

💟 派飛同等位有少少混亂，A姐姐派完飛/嗌完號碼去做嘢，B姐姐再出嚟派飛/嗌號碼就會唔知去到邊個號碼

💟 其實好想再去老闆娘米線食完寫食評，但係已經平均要等1-2個鐘，真係好耐😖

📍 貴香園

地址：旺角西洋菜街216號地下