[香港/石籬] 米線關注組另一大熱 雲南小鍋米線 (石蔭米線)

推薦：🍉🍉🍉🍉🍉 (5/5)       味道：🍉🍉🍉🍉🍉  (5/5)          

價錢：🍉🍉🍉🍉 (4/5)             打卡：🍉🍉  (2/5)                      

位置：🍉🍉(2/5)                         回訪：🍉🍉🍉🍉🍉 (5/5)        

小鍋米線 配雞絲、菜肉雲呑 (小辣，走韭芽) $48

平時睇圖見到啲雞絲成座山咁高，點知我哋呢碗一嚟到見到得咁少有少少失望，就算計埋浸咗落湯個啲都無平時見到其他人嘅圖咁多😐雞絲切得超碎，食落吸哂啲湯嘅辣味，超正，不過有幾啖比較韌🙈菜肉雲吞非常有驚喜!!一咬第一啖落去啲菜味湧哂出嚟，勁香，食落發現應該係有酸菜加持，成個餡都係大部份都係菜，好少肉，不過個餡大粒足料得嚟好彈牙，再加埋爽口菜粒，我個人嚟講覺得非常好食!!😍😍

小鍋米線 配螺旋藻、腩肉 (小辣、走芽菜) $48

螺旋藻同雲川一樣都係片狀，不過唔同嘅係食唔到有梗，同埋偏向滑潺潺嘅比較多，份量都多咖!😆 一樣都係吸哂啲湯，好惹味😋腩肉都幾出色，每件大小比其他店舖細塊，大約係豬頸肉嘅size，不過份量都多嘅👍外層有微微嘅麻油香，偏瘦(正!)，腩肉本身有調味，就咁食已經夠味，加埋湯嘅辣味就再多咗一個層次，而且都唔會太鹹👍

最想分享嘅就係，我哋當日兩碗同樣都係叫小辣，但係兩碗湯底唔同味，雞絲個碗辣啲但唔酸，螺旋藻夠酸但唔辣，同一時間叫但係湯底咁唔同都好似係第一次試😂咁啱我鐘意食偏酸嘅湯底，食螺旋藻個碗覺得湯底非常合我口味，辣啲個碗明顯感受到辣椒味都香啲，惹味啲，下次再食可以挑戰吓中辣! 米線係幼身米線，煮得偏淋，正常水準😋

後記

💟 當日我哋唔係用餐高峰時段去食，所以只有前舖有開，亦唔洗排隊，如果大家嚟到見到前舖要排隊可以望吓後舖有無位😋

💟 因為唔係住係附近，地點真係唔係太就腳，好少會去附近，所以回訪機會就比較低啦，可能真係有機會再去附近先會再食

💟 街坊生意，衛生環境麻麻就預咗咖啦，不過舖頭生意太好，電話不停響但係店員又趕唔切聽，加上個電話真係好大聲，搞到有少少精神緊張，好快食完就極速飲埋杯嘢飲走咗🙈

💟 暫時私心都仲係肥仔米線排第一🙊

📍 雲南小鍋米線 (石蔭米線)