[香港/觀塘] 價錢親民 性價比高嘅台灣菜餐廳 阿元來了

推薦：🍉🍉🍉🍉 (4/5)                 味道：🍉🍉🍉🍉  (4/5)           

價錢：🍉🍉🍉🍉 (4/5)                 打卡：🍉🍉🍉🍉  (4/5)                       

位置：🍉🍉🍉🍉 (4/5)                 回訪：🍉🍉🍉🍉 (4/5)        

前排上網睇到有人話係香港搵唔到又好食又抵食嘅台灣菜餐廳，搞到我又想搵間試完寫吓食評。呢間「阿元來了」應該好多人都識，我自己都食過幾次，絕對係又好食又抵食嘅台灣菜餐廳候補之一！今次終於的起心肝決定要寫吓佢嘅食評啦😂

阿元魯肉飯 (大) $42 🍉🍉🍉🍉

份量嚟講應該唔夠一個男仔當一個正餐，不過好適合一大班朋友嚟share食，加多幾個小食就啱啱好，佢個價錢其實都唔算貴，比起其他台灣菜連鎖餐廳已經算親民🙆啲汁足夠可以撈到每啖飯都有汁，唔會過鹹，魯肉係肉碎，更有咬口，肥瘦適中，唔會啖啖肥膏，好正😛

蚵仔大腸麵線 $40 🍉🍉🍉🍉

大腸份量正常，唔算多肥膏，麵線湯底偏稠，唔會食到一半就變到水汪汪，麵線都唔會好碎，同台灣味好似😭

塩酥雞 $37 🍉🍉🍉🍉

炸粉好薄，雖然有雞皮，但係唔會食到成口油/成嚿都係得雞皮同炸粉👍每嚿都係一口size，雞味無乜但係肉質好嫩滑😋😋

台灣香腸 $30 🍉🍉🍉

大約係一條台灣腸嘅份量，30蚊嚟講有少少唔抵，但係真係仲未搵到香港有邊度食台灣腸係抵食😢好多餐廳都係$20左右1條腸，成日都好掙扎叫唔叫嚟食好😢蒜片分開上呢樣幾好，啱哂淨係想食腸唔太好蒜片嘅朋友，腸仔煎得脆皮，有少少焦香，好香口😋

九份芋圓 (冷) $32 🍉🍉🍉🍉🍉

有芋圓、仙草、珍珠、紅豆，呢個價錢嚟講都算大碗同足料，芋圓唔會中心硬/未熟，好煙韌，就算share嚟食，每樣配料都好足夠3個人食😆

奧利奧咖啡餅 $12 🍉🍉🍉🍉

面頭真係有塊Oreo餅乾! 本身以為仲係脆嘅，會同紅豆餅個口感唔夾，但係整嘅時候已經俾蛋漿整淋咗，令到一咬落去嘅感覺好似紅豆餅入面有滿滿嘅Oreo餡咁，超正! 一咬落去仲會食到流心嘅咖啡餡，咖啡味非常香，唔甜亦都唔會苦，怕咖啡味會苦嘅朋友絕對唔洗擔心!

酒漬葡萄奶酥餅 $13 🍉🍉🍉

呢款嘅餡唔流心，話到明係奶酥，就係有啲似鳳梨酥嘅餡咁，只係個餡係用奶粉同奶油整成🙆 酒味唔太多，有好微好微嘅苦味，葡萄乾份量都幾足，差唔多每啖都會食到，想試吓特別口味嘅朋友一定唔可以錯過！

後記

💟 雖然大伯紅豆餅嘅舖面係餐廳隔離，不過都可以入到去叫嘢食嘅時候順便叫埋，買幾個會有優惠，記得問清楚先落單啦~

📍 阿元來了

地址：觀塘鴻圖道28號地下後座