[香港/尖沙咀] 少女心粉紅色theme cafe 估唔到又幾好食 Dazzling Cafe

推薦： 🍉🍉🍉🍉 (4/5)        

味道： 🍉🍉🍉🍉 (4/5)

價錢： 🍉🍉🍉 (3/5)              

打卡： 🍉🍉🍉🍉🍉 (5/5)

位置： 🍉🍉🍉🍉 (4/5)        

回訪： 🍉🍉🍉🍉 (4/5)

義式牛肝菌香菇意大利麵 $98 🍉🍉🍉

鹽酥雞拼盤 $98 🍉🍉🍉🍉

有炸甜不辣、鹽酥雞、炸花枝丸，望落好似好的式，但係其實份量超多，雖然係拼盤，但係每款嘅份量都應該有其他餐廳單叫一個小食咁多，啲炸甜不辣係食足全餐都仲有淨😂最尾要每人分幾條食埋佢😂炸甜不辣同炸花枝丸嘅炸衣都唔算厚，花枝丸咬開入面仲有墨魚粒(希望真係墨魚)，超有咬口，好正! 甜不辣都係非常煙韌，面頭嘅椒鹽好惹味👍

鹽酥雞係一口大小，有啲望落好細粒/好薄，以為係雞皮/炸粉，點知入面都有雞肉😂外層有啲硬，雞肉依然好嫩滑，仲有肉汁，亦食到雞肉香👍

京都宇治抹茶紅豆鬆餅 $85 🍉🍉🍉

呢個價錢嚟講算係有少少貴，本身以為會連個waffle都係抹茶味，結果只係普通蛋漿味🙈鬆餅切開好脆，食落略嫌無落蛋香同唔夠軟熟，抹茶雪糕唔算太出色，但係因為本身抹茶雪糕同waffle好夾，所以都唔算太差，亦都有cream、黑糖、紅豆蓉伴碟，有好多選擇👍不過個馬卡龍食落藥水味扣咗分🙈

Dazzling 珍珠奶茶 (熱) $40 🍉🍉🍉🍉

相信呢碗珍珠應該係珍珠奶茶飲品舖2份珍珠嘅份量(我最後都食唔哂😂)，珍珠有咬口得嚟個芯好軟熟，唔會似車呔，每一粒都有黑糖包住😛奶茶都幾大壺，飲落係台灣珍珠奶茶嘅奶茶味，茶味獨特，青茶、綠茶同紅茶嘅比例好好，幾清淡，唔係日式奶茶 (甜到漏)/港式奶茶 (絲襪奶茶)味，不過同樣亦都無乜茶香，就算只可以叫少甜都唔會太甜，似係街邊買嘅微糖甜度，我自己就覺得呢個甜度好啱我😆不過有一個缺點就係珍珠倒落杯之後會沉底，變咗唔可以同奶茶一齊飲到，一係就要自己舀起嚟食😂

玫瑰荔枝氣泡飲 $45 🍉🍉

後記

💟 本身諗住呢間cafe啲design咁靚，又好似咩嘢食都有得選擇，應該都唔會好好食，點知食完跌哂眼鏡，估唔到都幾好食，而且又唔算太貴

💟 嘢飲最多只可少甜，不可半糖/無糖

💟 現時餐廳外嘅座位係屬於C區，未必會開放，有機會只開放餐廳內嘅座位~ 如果想坐卡位就記得訂位啦

📍 Dazzling Café

地址：尖沙咀彌敦道100號The ONE 3樓22號舖