[香港/旺角] 當堂嚇一跳，然後得啖笑嘅 Outdark

推薦指數: 💜 💜

最近放寬咗限聚令，可以同多幾個朋友一齊食飯，於是就去咗呢間聽講好出名嘅韓國餐廳，平日夜晚都要等一個鐘頭左右先有得入座就知呢間餐廳有幾多人去食，只可惜對今次嘅體驗唔係太滿意，亦都好可能唔會再去第二次😢🙈(想睇重點係最尾)

炸雞: 當晚選擇咗半半炸雞 (蜜糖味同甜辣味)，算係叫咁多款嘢食當中唯一好食嘅，一食就知係啱啱炸完再淋汁，外皮就算淋咗汁都仲好脆，唔算重口味，辣度適中，甜辣味好惹味，雞肉雖然無乜肉汁但係好嫩滑😋伴碟有三款炸薯：炸薯條、炸薯格同炸薯塊，外皮佈滿灑上去嘅芝士粉，所以會食到甜甜哋，份量十足😋最後唔夠飽叫多咗碟幾分鐘就掃哂🤣

海鮮辣炒年糕: 唔算好辣，年糕唔算好彈牙，非常普通，海鮮有蜆同炸魷魚，食落發現得蜆殼，蜆肉唔知去哂邊，配菜(真係蔬菜)仲多過年糕+海鮮🙈不過因為我哋整燶咗，食食吓啲年糕有啲飯焦嘅感覺😂同埋食到最後就會覺得超級鹹，食一嚿年糕飲咗成杯水都仲覺得鹹🙈

魚糕湯: 無得去韓國食街邊$1000won 2串嘅魚糕，就唯有試吓呢兜接近$200港紙嘅年糕湯，暗暗希望佢可以好食啲，值回票價少少啦🙈嚟到發現佢係放魚糕嘅韓式「關東煮」，無啦啦有兩串獅子狗係度充撐場面🙈魚糕非常普通，好淋，無咬口，個湯就係味精味噌湯+少少胡椒(正正就係關東煮個湯底嘅味道) 鹹到極致，完全唔係喺韓國街邊飲嘅年糕湯，飲咗碗湯之後灌咗兩杯水都仲覺得好鹹，翻到屋企飲多枝茶都仲未解到渴🤦🏻‍♀️

海鮮煎餅: 同辣炒年糕同一個感覺，似食緊韮菜煎餅多過海鮮煎餅，成塊餅都係韮菜味，加多少少辣椒味，海鮮好少，一份煎餅可能得一嚿魷魚，仲要好似香口膠咁，咬哂成塊餅都仲未咬得爛嚿魷魚🙈🙈另外少扣分嘅就係上菜嘅時候無跟埋醬油，雖然未必會點，但係呢方面覺得店家唔夠細心

蘋果芒果味米酒: 一嚟到見到覺得唔似係酒，面頭啲碎冰，隻顏色，再加上質地稠稠哋，真係好似芒果西米露😂 好易飲口，幾甜，無乜酒味，似飲芒果汁

飯糰: 最簡單嘅飯+紫菜+蟹籽，基本上唔會唔好食，略嫌唔夠麻油同蟹籽

總結： 喺香港食韓國嘢真係好唔抵😪

後記

💟只可以喺Openrice上Book 位，打電話去都係叫你去番Openrice book，所以如果想去試就要去睇下邊晚有啱嘅時間先啦

💟當日我哋6點左右去到，因為入面仲有位，所以未開始派飛，點知行咗陣，7點番到去，再拎飛已經派到30號，話要等1.5-2個鐘，甚至有機會食唔到，最後好彩一行六人等咗一個鐘就有位

💟重點來了，因為啲嘢食真係鹹+有味精，食咗一陣已經叫waiter想要幾杯水，點知叫咗幾次都無人拎嚟，一入座個陣講低過限時個半鐘，點知食咗45分鐘就話last order要俾錢先，我哋就趁佢放低張單嘅時候叫佢俾幾杯水，都係無嚟，佢再行埋嚟收番張單嘅時候再問佢想要幾杯水，都係唔嚟，最後我哋因為唔夠飽叫多碟炸雞，之後先拎幾杯水嚟，服務態度真係好需要改善sosad🙈

Outdark

地址：旺角彌敦道613號飛達商業中心2樓