作為半個荃灣地頭蟲，今次終於輪到要介紹荃灣嘅餐廳啦!!😆😆今日介紹嘅呢間小有名氣嘅吉列牛餐廳，除咗係想同大家分享之外，其實係因為自己好想食😂😋😋

板燒安格斯牛+定食 💜💜💜💜
個餐一嚟到就感受到餐廳絕對無手軟! 牛肉油脂分佈均勻，雲石紋好靚，百幾蚊食到呢個質素真係值回票價😍食落肉質嫩滑，好多肉汁，點咗燒汁都仲食到牛肉味，未去到入口即融，但係呢個質素都已經好收貨😋每塊牛肉嘅厚薄都算平均，不過食到有1,2塊有少少筋，要咬多幾吓

每塊牛放上鐵板好快就燒好 (建議各位燒嘅時候每塊只翻一次就好，因為每塊肉都唔算厚，驚太生可以輕輕拎起睇下夠唔夠熟，唔洗燒得太熟)

板燒吉列牛+定食 💜💜💜💜💜

吉列牛比起就咁安格斯牛厚啲，外皮唔會夾起/放上鐵板就散開哂，燒完都仲係咁脆，而且因為有少少調味，同安格斯牛食落唔會好似鐵板燒咁所有嘢食個味道都係千篇一律😛

每份套餐都會有一細嚿牛脂肪俾大家當油咁搽喺鐵板上面，但係當日我哋叫嘅三個餐個粒脂肪都真係好細粒，搽完第一次就已經幾乎唔可以再用，所以大家要慳住嚟用😂

定食
味素加飯真係好犯規，基本上加得味素都一定好食，唯一美中不足嘅就係碗飯大碗得嚟唔夠味素，撈唔哂所有飯🙈

流心蛋有用楓糖調味，同平時喺日本餐廳食嘅普通流心蛋唔同味，但係我略嫌蛋黃偏熟，再生少少就仲好😋

昆布湯嘅胡椒味好濃，飲落比較似胡椒清湯，我個人嚟講就唔係幾鐘意個湯🙈🙈

飲品

葡萄汽水 💜
網上睇到嘅餐牌上櫻花汽水變咗呢款葡萄汽水，飲落同美X達提子汽水嘅味道一模一樣，唔係巨峰/日本紅提味，係純粹提子味糖漿嘅汽水，唔建議大家叫嚟飲

澳洲青檸梳打 💜
呢枝更加中咗個大伏，一飲已經覺得好酸，係青檸+檸檬味加埋雙重嘅酸，差唔多吞個陣會再有一陣梅嘅酸味，真係酸到盲公都開眼 (好老土但係係最貼切嘅形容😀)

後記
💟 餐廳面積較細，位置唔多，試過兩次6點幾去到都已經派哂當晚嘅籌，好想食嘅朋友可以喺落完場再開舖嘅時間拎咗飛先，人齊/差唔多時間食嘅時候再番去報到

💟 因為張枱唔算大，所以搽完油放塊牛上鐵板之後好易俾油彈到😖😖

💟 我哋係食呢餐途中每個爐各加咗3-4次燃料，加得都幾密，我自己就覺得唔洗咁密都得，有幾次加燃料嘅時候個火都仲係好旺😂反而係塊燒肉嘅鐵板如果可以換1次會比較好，因為燒到後期塊鐵板面已經有「焦」，再放塊牛上去燒完拎起已經成塊牛都係焦(如下圖)

💟 抽氣系統唔夠勁，一入去就會見到成間餐廳好大煙(有啲似日本居酒屋/餐廳嘅吸煙區咁)，食完出番嚟會好似食韓國燒肉咁全身都係味，第一印象會因為啲油煙而覺得間餐廳唔係好乾淨

💟 食完之後特別想講，我真係好想去日本呀😭😭

秘 Master Chef
荃灣享成街22號地舖