韓國街少數抵食韓國餐廳 HAN SPOON

大家都知喺香港食韓國嘢通常都係又貴又唔抵，但係咁耐無得去旅行，好想食韓國嘢可以點? 除咗嚟緊會為大家介紹喺韓國嘅地道餐廳之外，今日等我率先為大家介紹間抵食嘅韓國餐廳先啦!

呢間位於尖沙咀韓國街嘅HAN SPOON，有兩個舖位可以入座，不過香港寸金尺土，兩個舖位坐到嘅人都唔多，兩邊各坐到15-20人左右。老闆係韓國人，所以大家落單都要用英文/金手指大法啦😂入座之後店員會放低熱麥茶 (보리차)，雖然係普通嘅熱麥茶，感覺上有心思過就咁水/熱茶😛

到訪當日我哋嘅小菜係泡菜、拌芽菜同醃薯仔，應該每日/星期都唔同，醃薯仔甜甜哋，浸到淋哂，幾好食，其他就普普通通啦，都唔會難食得去邊😂

鐵板烤辣豬肉配大醬湯 💜💜💜💜

望落就非常深色，好似好重口味咁，但其實唔會太鹹/辣，撈飯食一流，豬肉大細適中，唔會好似某啲餐廳咁啲豬肉又大嚿到放唔到入口又咬唔爛

記得上枱既時候要撈一撈 如果唔係就好易燶哂

大醬湯

因為我哋選擇咗烤辣豬肉個套餐，所以兜大醬湯係細少少嘅。飲落覺得稍淡，唔會死鹹，比較偏向係韓國人囓煮法，唔會有蜆、或者其他奇奇怪怪嘅配料。因為習慣咗韓國人個種食法 (倒哂成碗飯落湯撈嚟食✨)，所以留意到碗飯比起碗湯嚟講太大碗，如果倒哂成碗飯落去就會吸哂啲湯，變左飲唔到啲湯。如果可以嘅話，細碗嘅湯配番細碗嘅飯會更好，又唔會浪費咗啲飯😋

原味炒年糕(辣) 💜💜💜💜💜

一食落去就好強烈嘅甜辣味，食耐咗會覺得有少少辣，但係都接受到，味道絕對係韓國地道嘅辣年糕味，加咗少量辣椒粉，年糕非常有咬口，超級彈牙，唔會好似煮唔熟咁硬到咬唔入，又唔會熟到一咬爛哂咁😋年糕同魚糕嘅份量都好足料，唔會成碟都係菜，得幾嚿年糕，絕對係可以再戰!😍

後記

💟因為地方比較逼，好難坐到6個人以上，午餐嚟講抵食，但因為韓國菜晚餐通常都係share嚟食嘅嘢多，少人嚟就未必食到好多唔同款嘅菜式

HAN SPOON

地址：尖沙咀金巴利街3號地下