CP值超高嘅小店 京滬坊

推薦指數：💜💜💜💜💜又係黃埔系列，因為最近成日都去黃埔，歡迎大家提供情報俾我去勻港九新界試伏呀😆
今次想為大家介紹一間應該無乜人介紹過嘅小店，最初去呢間小店係因為好想食小籠包，想搵啲平價少少嘅餐廳試吓，點知食過一次之後覺得性價比好高，決定要介紹俾大家！
(呢間小店正正係曾經介紹過嘅「讚好台灣」隔離)

排骨擔擔麵 $50 💜💜💜

好大碗，麵係幼麵，無咩特別，份量好足，湯底唔會淨係得花生醬味，略嫌唔夠辣。排骨都算大件，炸完唔會太乾唔會太油，亦唔會好「UN」，不過如果每件切大件啲會食得更滋味😋

小籠包 $33/4粒 💜💜💜💜💜

好平民嘅價錢，但係手工完全唔馬虎，小籠包皮薄，連頂頂個埋口位都唔會厚到蒸唔熟，咬開之後好有驚喜，湯水有一隻匙羹咁多(可能仲多)😍清清哋，無乜味精味，肉餡好有咬口，無乜肥肉，好有驚喜！😆 如果個醋多幾條薑絲就會更好啦😛呢個質素真係好食過唔少酒樓，仲要咁平，真係好推薦大家一試！

紅油抄手 $33/6隻 💜

應該係咁多個餸之中最普通，只係普通辣椒油浸雲吞嘅食感，雲吞皮薄，加上一般菜肉餡嘅味道，不過不失，紅油就真係就咁辣椒油，完全無特別，有啲可惜😢

豆沙鍋餅 $42 💜💜💜💜

高力豆沙同豆沙鍋餅都係兩樣我本人非常鐘意食，但唔係間間上海舖都有得食嘅甜品。第一次嚟呢間小店就係因為見到有小籠包同豆沙鍋餅，就二話不說決定嚟呢間餐廳😛

好彩都無失望！一嚟到已經好驚喜，又大碟又香，一睇就知新鮮出爐😍外層厚薄適中，唔會一咬就出哂油，影完一輪相都仲好脆，紅豆蓉唔會太甜，整得好均勻，唔會仲食到紅豆皮，舖滿哂成個內層，唔係求其用匙羹噠一pat落去嘅感覺，滿足到下次再嚟淨係食豆沙鍋餅都可以食兩碟！！🤩🤩

後記

💟 講到明小店，地方當然唔大，所以座位會比較窄少少，亦都唔多四人枱，好似只有兩張左右，唔會話坐得好舒服，不過當晚見大部份客人(包括我哋)都係食完就走，無特別坐耐多一陣傾吓計個啲，所以都算OK

京滬坊

紅磡湖光街1-7號聯成大廈鴻運閣地下12號舖