[香港/灣仔] 保持水準多年嘅灣仔蛋包飯貓之眼👀

By tsz - 星期三, 12月 16, 2020

[香港/灣仔] 保持水準多年嘅貓之眼👀

推薦：🍉🍉🍉🍉 味道：🍉🍉🍉🍉 價錢：🍉🍉🍉

打卡：🍉🍉🍉🍉 回訪：🍉🍉🍉🍉

太耐無去日本，最近成日都好想食日本嘢，特別係蛋包飯。講起蛋包飯，就不得不提吓呢間「貓之眼」，第一次去其實係幾年前喺灣仔做嘢嘅時候，當時已經好出名，好多人排隊，雖然當時都覺得好好食，但係心入面都係覺得有少少貴，喺日本食平好多🙈點知今年一次日本都去唔到😭😭唯有係香港食住「貓之眼」止住渴先😭

Cat's eye 特選 (咖喱‧濃茄‧漢堡排) $108

和牛漢堡一入口有少少溶喺口入面，唔係全熟，有少少位有啲生，如果唔食生肉嘅朋友要注意啦❗味道方面，好重胡椒味，覺得有少少浪費咗啲和牛，如果少啲胡椒，牛肉味就更加出味😋 漢堡入面嘅洋蔥食落令到漢堡有爽口嘅食感，好有驚喜!

蛋包飯嘅主角蛋，熟得啱啱好，唔會有啲位過熟，日本蛋嘅蛋香，再加埋忌廉嘅香味，食落口又香又滑，真係好正😆

濃茄汁用真蕃茄熬制而成，汁入面嘅牛粒有少少碎骨，有少少影響食感🙈蘿蔔粒熟透，好冧，唔會最入面仲係硬嘅，而且吸哂啲汁，非常惹味😋咖哩係日本咖哩，偏甜，有微微嘅黑椒辣味，食落似用咖哩磚嘅時候再加咗自己嘅調味，不過咖哩汁入面嘅豬肉有少少「UN」，有少少扣分😢

白飯偏濕，比一般嘅日本米米香偏少，雖然飯嘅份量唔多，但係加埋所有餸其實份量係好大份咖😝

日式鰹魚汁冷豆腐 $28

我哋6點去到，豆腐已經淨番一份，我哋好幸運地食到最後一份🙈豆腐好綿滑，豆味好香，不過唔入味，豆腐還豆腐，鰹魚汁還鰹魚汁咁，另外因為我唔太鐘意薑味，就覺得薑略嫌落得多咗少少🙈

自家製焦糖雞蛋布丁 $42

焦糖佈滿成個甜品，好濃味，面頭有用火槍微微燒過，食落脆脆哋，但係都唔會蓋過雞蛋味，蛋味非常香，入口唔會覺得太甜太「流」，明知個甜品好肥都忍唔住一啖接一啖咁食😖要減肥嘅女仔食完應該要跑多幾個圈先抵銷到😖😖

我哋去到嘅時候布丁已經得番4份，同埋見餐廳內嘅餐牌見係期間限定，可能遲啲就會轉第二樣甜品咖啦❗

4.3度特濃牛乳 $18

係一杯普通不過嘅4.3牛乳，$18一杯有少少太貴

後記

💟 因為呢間餐廳都非常出名，同埋有啲食物可能會提早賣哂，所以想去嘅朋友最好就避開正常嘅用餐時間，同埋早少少去食啦💜