[香港/黃埔]  同期望有落差嘅黃埔白布烏冬 麵.睦月

推薦：🍉🍉            味道：🍉🍉🍉             價錢：🍉🍉🍉 

打卡：🍉🍉            回訪：🍉🍉   

嚟到短期內暫時最後一篇位於黃埔嘅餐廳食評啦，今日同大家介紹嘅呢間「麵.睦月」，係網上有唔少好評，我見咁多好評就好奇想去試吓，點知去到就覺得同網上睇到嘅食評有少少落差🙈

日式咖哩雞 (轉流水烏冬) $63 🍉🍉

本身一心想嚟試闊麵(即白布烏冬)，但係員工話暫停供應，唯有轉食流水烏冬😩一嚟到見到咖哩汁同雞嘅份量都幾足料，期望又再高咗少少。烏冬係扁嘅幼烏冬，食感太淋，淋到唔洗咬就斷咁🙈

雞嘅份量好多，連雞皮炸，有幾件都因為太大嚿，一啖咬唔哂，如果可以保持番每件都係差唔多大細嘅話應該會好少少，雞肉食落無乜肉汁，感覺炸得太耐，肉質有少少「UN」🙈

咖哩都係日式咖哩，不過辣多過甜，似係就咁咖哩磚融出嚟嘅味道

 + 赤板魚丸 $8 🍉

出於好奇另加咗呢個赤板魚丸試吓係咩嚟，原來就係類似鳴門卷嘅魚蛋，員工放低嘅時候我第一個反應係感嘆廚師嘅刀功，竟然可以切到咁薄，果然係有番啲功架😅😅我諗呢8塊都無原條魚丸嘅20分之一，好後悔加咗呢個魚丸🙈

麵豉湯

跟麵附送，除咗死鹹(得個鹹字)之外無咩特別😢

熱蜂蜜綠茶 (加$5) 🍉🍉🍉

食咁濃味嘅咖哩就打算叫番杯清淡少少嘅綠茶中和吓，飲落茶味好濃，唔會飲到最底先飲到蜂蜜味，幾好飲😋

紫心QQ波 $18 🍉🍉

其實就係香芋紫薯波，香芋波嘅味道，紫薯嘅顏色，無乜紫薯味

(KFC個雙色蕃薯波都係$13，而且份量仲多，比較之下就覺得$18得3粒有少少貴🙈)

後記

💟 網上睇食評好評如潮，點知今次自己親自去食嘅體驗唔係幾好，可能真係期望太高，之後回訪機會都應該幾低😢

麵.睦月

地址：紅磡湖光街7號聯盛大廈地下10B1號舖