[香港/深水埗] 新穎足料有驚喜 KOKONI Coffee

推薦：🍉🍉🍉🍉        味道：🍉🍉🍉🍉             價錢：🍉🍉🍉 

打卡：🍉🍉🍉🍉        回訪：🍉🍉🍉🍉   

深水埗大東街愈開愈多cafe/餐廳，鐘意飲咖啡同食嘢嘅我就當然係非常開心啦，但係咁大量嘅新cafe/餐廳，再加上大量想去打卡嘅顧客，餐廳到底係會係咁大競爭嘅情況下提升食物質素，定係需求過大而粗製濫造呢…根據經驗，發現嗰度啲餐廳質素都幾參差，大家去之前都真係要做足功課，如果唔係都幾容易中伏🙈

今日就介紹其中一間叫KOKONI Coffee嘅cafe俾大家先，之後再同大家分享多幾間😋到訪當日其實原本唔係想去呢間，但係因為本身想去個間太多人要排隊，我又好肚餓，所以就求其係附近搵咗間無人排隊嘅就入去食，結果就嚟咗呢間啦😂

鰻魚Egg drop $85 🍉🍉🍉🍉

店內食物只有Egg drop同甜品，所以分別叫咗鰻魚同牛肉Egg drop😋兩塊多士中間再夾埋啲料真係好厚，第一啖咬唔哂，淨係咬到兩塊多士😂多士微微烘過，牛油香無乜，只有本身塊多士少少甜味，唔似韓國咁會加醬同大量牛油。鰻魚食落好多醬汁，無骨，而且份量比我想像中多!大約有2/3塊多士咁大嘅鰻魚!! 蛋都幾滑，無過熟，份量多，蛋汁既份量控制得好好，唔會食到下面蛋個個位既時候兩塊多士已經淋哂😆

牛肉Egg drop $78 🍉🍉🍉

同鰻魚一樣，牛肉嘅份量非常多，醬汁好濃味，蓋過埋牛肉嘅味道，係牛肉蓋飯個種牛肉味，加埋滑蛋，成個多士甜甜哋，味道好夾😋如果塊多士再烘燶多少少就更加好啦😍

抹茶Roll $45

海綿蛋糕部分好軟熟，抹茶cream濃味得嚟好清甜，唔會濃到好似食咗一啖抹茶粉咁，而且cream好滑，如果再雪凍少少就更加好😍

Hot Latte $40 (Iced $45) 🍉🍉🍉

個拉花好有心思嘅，但係有少少唔知畫緊咩😂聞落無乜咖啡香，飲落微苦唔酸，好適合唔係成日飲咖啡嘅人，奶就唔算非常滑，正常發揮

Hot Matcha latte $50 (Iced $55) 🍉🍉🍉🍉

呢杯個拉花正常番😂飲落口抹茶味非常濃郁，有少少回甘，但係未至於會覺得苦，恰到好處，奶都係唔算好滑，過得去，主要係抹茶嘅味道太出色，好快就飲哂成杯😆

後記

💟 呢間cafe係pet-friendly，除咗有戶外座位方便帶寵物嚟嘅客人之外，仲有dog menu俾主人叫嘢食俾狗狗食😆

💟 呢間cafe有pourover coffee咖!! 只有當日嘅豆唔係好啱我口味，所以最後無叫到 (價格介乎$65-90)

💟 無用餐時間限制

📍 KOKONI Coffee

地址：深水埗基隆街156號地舖