[香港/旺角] 一餐食勻台日西意菜 與朋友傾計散心之選 茶聊

推薦：🍉🍉🍉🍉               味道：🍉🍉🍉🍉            價錢：🍉🍉🍉

打卡：🍉🍉🍉🍉🍉          回訪：🍉🍉🍉🍉

黃金軟殼蟹蟹膏龍蝦汁意大利飯 $158 🍉🍉🍉

主食份量唔多，龍蝦汁、蟹膏同軟殼蟹唔算好香，好似同個飯係兩件事咁，唔係太夾，同埋可能因為我唔太鐘意蔥，覺得太多蔥🙈 反而可以多少少瓜😛個飯就軟硬適中，意大利飯嚟講佢唔算好濕，啱啱好係每粒飯都好似包住汁嘅程度，呢樣我覺得幾好😝

西班牙油炸鬼 $88 🍉🍉🍉🍉

其實即係churros😂一坐低見到隔離枱碟churros咁大碟已經決定要叫嚟試!! 呢碟個口感比較似放咗一陣嘅油炸鬼質地，唔太脆，偏淋，勝在份量真係好多，出去食可能30幾蚊先得1條，隨碟附上嘅朱古力醬好濃郁，唔太甜，一啖點一吓都唔會覺得膩😋

伯爵3.6牛乳梳乎厘 $98 🍉🍉🍉

本身係有爆漿效果，點知最頂個嚿反艇，失敗咗😂😂睇圖會預期份量再大件少少，嚟到得2嚿，比想像中少🙈梳乎厘好軟熟但係無乜蛋香，空氣感適中，食落又唔會太膩😋不過Earl grey醬好稀，有少少唔肯定係用嚟點嘅醬定淋上面嘅汁🙈隻色倒完出嚟之後唔係幾美觀🙈🙈

髒髒黑糖珍珠鮮奶 $44 🍉🍉🍉🍉

嘢飲係無得少甜，叫嚟打卡影相用一流，幾有特色，面頭層可可粉適中，唔會一飲就吸到啲粉「濁親」，珍珠好煙韌，飲到黑糖嘅甜味，不過就無某幾間黑糖珍珠舖嘅黑糖炒得咁香🙈我平時叫嘢飲都會走甜，呢杯飲品嘅甜度我覺得可以接受，無坊間嘅黑糖珍珠鮮奶正常糖度咁甜

布蕾黑糖珍珠鮮奶 $44 🍉🍉🍉

呢杯飲品面頭有層微燻嘅焦糖模仿creme brûlée嘅食感，飲落嘅味道大致同髒髒黑糖珍珠鮮奶差唔多，不過呢杯甜啲

後記

💟呢餐埋單都過$400，但係只可以現金/支付寶，有少少唔太friendly，如果有得碌卡就更好啦

📍 茶聊 Tearapy

地址：旺角砵蘭街189號1樓