[香港/銅鑼灣] 試業期內試食Omakase 食物高水準有驚喜 極鮨

推薦：🍉🍉🍉🍉 (4/5)                          味道：🍉🍉🍉🍉  (4/5)           

價錢：🍉🍉🍉 (3/5)                               打卡：🍉🍉🍉  (3/5)                      

位置：🍉🍉🍉🍉 (4/5)                          回訪：🍉🍉🍉  (3/5)            

前排見到網友推薦一間新開喺銅鑼灣嘅omakase，新張期內每位客人可以以優惠價試食壽司，於是就膽粗粗就走去book位試吓😂

呑魚腩軍艦 $9 (原價$48) 🍉🍉🍉🍉🍉

呢件就係優惠價9蚊可以試到嘅呑魚腩軍艦，係呑拿魚腩蓉，賣相已經非常吸引😍一咬落口嘅第一感覺就係塊紫菜真係好脆，試過去食一間omakase啲壽司嘅紫菜係淋哂，真係扣咗好多分😢😢另外呑魚腩係非常鮮甜，唔會有筋，咬都唔洗咬就吞哂，9蚊食到呢個質素真係好抵食，如果係原價就可能會錯過咗呢款咁正嘅軍艦了😍😍

八貫 $388 🍉🍉🍉🍉🍉

叫壽司拼盤之前店員有同我哋介紹每款當日有咩壽司，每款拼盤都一定會有一件(或以上)拖羅😋當日我哋叫咗八貫，包括有三文魚子軍艦、蟹膏蟹肉軍艦、帶子壽司、金目鯛壽司、池魚壽司、深海池魚壽司、鯛魚壽司同拖羅壽司

首先，每一件壽司都完全無嚿飯會散/痴喺枱嘅問題，雖然聽落好basic，但係真係唔係每間嘅師傅都做到，飯嘅酸度好配合魚嘅鮮味，突顯到魚生嘅鮮甜味，蟹膏唔會有腥味，完全唔洗點豉油嚟食，特別想講拖羅係非常肥美，雖然未去到入口即融，但係都拍得上日本當地食嘅水準👍👍

炙燒左口魚邊壽司 $36 🍉🍉🍉🍉🍉

另外單點嘅2件左口魚邊壽司，又係勁肥美，好濃味，肉質滑得嚟煙韌，好似成嚿油放落口咁😂 私心覺得有啲好食過哂八貫咁多嚿😂😂

西京骨腩 $78 🍉🍉🍉🍉🍉

即係西京燒骨腩，有少少似照燒汁嘅味道，都係離不開味噌、味醂等材料整成甜甜嘅醬汁，話明骨腩就梗係又多骨又油咖啦，不過廚師處理得好好，就算銀鱈魚咁多油，食落口都唔會覺得油立立/成口油，條魚煎到啱啱好，痴住喺魚骨之餘輕輕力一推就會甩，魚肉好嫩滑，每啖都食到魚味+醬汁嘅甜汁，連骨都有醬汁嘅味道，完全係食落一嚿接一嚿，食到停唔到😂😂

高野豆腐煮 $98 🍉🍉🍉

望落同食落都好似日本煮家菜，有菇、秋葵、蘿蔔同豆腐(硬豆腐)，似日式雜菜煲，應該都係用味醂、醬油等嚟調味，因為係用硬豆腐，唔會一夾起就散哂，可以成嚿豆腐放入口咬，豆腐都幾入味，可惜唔太岩我地胃口，本身驚唔夠飽同想食多啲熱食先叫，但份量少，唔太夠🙈🙈

甜品 🍉🍉🍉🍉

可選海鹽雪糕/抹茶雪糕，抹茶雪糕嘅茶味非常香濃，唔太甜，係純抹茶嘅味道而唔係抹茶拿鐵嘅味道，為當晚嘅晚餐完美作結💜

試業期內like 餐廳facebook page送咗一壺清酒

聞落微酸，飲落口body唔太厚，尾帶微甜，都幾好飲，只係aftertaste唔係太持久🙈飲過最好飲都係喺神戶食鐵板燒嘅時候，個杯清酒飲落口好似水咁，飲到最尾先會有酒味湧上黎+aftertaste好強，暫時喺香港嘅餐廳都未飲到咁正嘅清酒 (好想去日本😭)

後記

💟 Omakase每日供應嘅食材都唔同，建議問番店員參考當日menu

💟 壽司內有微量wasabi，如果唔要/有concern記得提早同店員講 (覺得店員係入座之前問吓客人有咩唔食會比較好，如果某啲食材入面有引致客人會敏感嘅物質就唔好啦)

💟 出文之際已經過咗試業啦，我哋去個日客人唔多，所以服務都好好，希望過咗試業之後都keep住有呢個水準啦~

📍 極鮨

地址：銅鑼灣軒尼詩道525號澳門逸園中心10樓