[香港/中環] 澳洲Gelato開到嚟香港啦 仲有香港限定口味 Gelato Messina

推薦：🍉🍉🍉🍉🍉 (5/5)                    味道：🍉🍉🍉🍉🍉  (5/5)           

價錢：🍉🍉🍉 (3/5)                                       打卡：🍉🍉🍉  (3/5)                      

位置：🍉🍉🍉 (3/5)                                       回訪：🍉🍉🍉🍉🍉  (5/5)            

澳洲過江龍(好老套) Gelato開到嚟香港啦，10月初岩岩開，作為雪糕迷當然要衝去試完寫包膠😍

當晚食完晚餐之後去到，咁啱好多人等緊，等左10分鐘左右就可以order啦，叫之前可以試食

因為唔肯定milktea味同egg tart 味係點，就試食咗一啖，milktea 味同egg tart 味其實好相似，有啲似午X之紅茶個隻奶茶味，一食就食得出糖漿味，好甜同好重奶味，無乜茶味，egg tart味就偏向似custard味道，兩隻味都唔算太吸引，所以最後無叫，都係叫番開心果同薄荷朱古力味

點知店員聽到我哋叫薄朱味之後同我哋講話係真係好重薄荷味，最好試咗先order😂😂😂試食時因為凍，感覺上係mint 80% choco 20%，係超級出色，食到心心眼都彈出嚟嘅級數，所以毫不猶豫叫咗薄朱味，不過因為買完之後開始融， mint 感降到大約60%左右，但都係非常出色👍👍👍 Gelato入面嘅choclate chip 好大塊，係一嚿朱古力咁大塊😂不過食落完全唔heavy，好脆口，而且唔甜，同薄荷味超夾

開心果味：非常濃郁，好香，唔算甜，食落好refreshing，個味道好似真係食緊開心果咁，超級nutty，係暫時喺香港食過最好食嘅開心果味Gelato (人生食過最好食嘅係美國，希望佢有機會喺香港開分店😭)

後記

💟 去嘅當日天氣已經凍咗，但係杯Gelato融化嘅速度都係超快，俾完錢行到出門口已經融緊，希望下次再去有得坐係度食😂😂

📍 Gelato Messina

地址：中環砵典乍街37-43號嘉寶商業大廈地舖