[香港/九龍灣] 觀塘超人氣米線店開分店喺九龍灣啦 臻味冰室豬扒酸辣米線

推薦：🍉🍉🍉 (3/5)                          味道：🍉🍉🍉🍉  (4/5)           

價錢：🍉🍉🍉 (3/5)                          打卡：🍉🍉  (2/5)                       

位置：🍉🍉🍉 (3/5)                          回訪：🍉🍉🍉  (3/5)            

呢間餐廳本身係觀塘非常出名，可惜我唔係成日去觀塘，無乜機會試，最近佢開咗間分店係九龍灣，終於去咗試🤣

秘製豬扒+韭菜餃酸辣米線 $48 🍉🍉🍉🍉

嚟得呢度當然要叫豬扒酸辣米線啦~ 另外因為見到韭菜餃好似都好多人試，就叫埋嚟試下😆

豬扒份量唔算多，兩件左右😉雖然係炸豬扒，但係咬落非常軟身，而且食得出炸之前有醃過，所以好入味😋韭菜餃皮薄餡足料，韭菜味唔算濃，食完都唔會成口味🤣餡料好實淨，唔太彈牙，我覺得肉嘅比例比較多咗少少，比較鐘意多韭菜少少嘅😌

呢間其實同另一間餐廳嘅米線都好似 (不過有報導話有衛生問題之後都好少再去了)，湯底係清湯再以酸辣菜同辣醬嚟調味，一開頭我叫小辣，不過後尾食咗幾啖覺得唔夠辣，另外再加咗辣 (其實即係加辣椒油)😂 辣度偏溫和，所以如果食得辣嘅可以試吓叫平時再辣一個辣度，不過因為湯偏多，其實連另外叫嘅辣椒油落哂都唔算好辣，反而相比之下麻嘅感覺比辣更多，鹹酸菜唔算太多，但好夠酸😍一碗米線麻酸辣味都齊哂，其實好正，不過我覺得個湯底太清，唔算非常啱我口味 (我偏好個湯底已經調好味)，對我嚟講算係中規中矩，經過會再去食，但係應該就唔會專登再去食🙈🙈

海蜇雞絲麻酸辣撈 $44 🍉🍉🍉🍉🍉

呢個喺Menu見到好特別就叫埋嚟試!! 一嚟到見到咁多酸菜已經超開心🤣 第一次試海蜇同雞絲撈米線，感覺好神奇，因為無湯，米線食落更加彈牙，雞絲份量又多又嫩滑，再加埋海蜇個種咬口感，比想像中更加好食😆辣味都係同豬扒米線一樣係落辣油，所以個味道都幾相似，唯一係因為鹹酸菜多啲，食落再酸啲，整體嚟講我比較鐘意呢碗多啲😂😂

後記

💟 米線無跟嘢飲/無餐，如果叫嘢飲要以正價另外叫，有少少唔抵:(

📍 臻味冰室豬扒酸辣米線

地址：九龍灣常悅道13號瑞興中心地下A號舖