推薦： 🍉🍉🍉 (3/5)    

味道： 🍉🍉🍉 (3/5)    

價錢： 🍉🍉🍉 (3/5)    

打卡： 🍉🍉🍉🍉 (4/5)    

位置： 🍉🍉🍉 (3/5)   

回訪： 🍉🍉🍉 (3/5)  

 

金柚沙律 $82 🍉🍉🍉🍉 

柚子嘅味道好獨特，好香、好開胃，好似無喺其他地方食過呢隻味嘅柚子 

酸辣鳳爪 $68 🍉🍉🍉 

雖然同金柚沙律一樣堆到成座山咁高，不過伴菜嘅份量比鳳爪多，食到一半已經要搵吓仲有無鳳爪，鳳爪無乜酸味，辣味適中 (同行友人食開譚仔10小辣就覺得有啲辣，食2,3嚿就要飲啖水嘅程度) 伴菜都係容易吸汁嘅食物e.g. 青瓜、洋蔥、蘿蔔，所以吸汁後酸酸辣辣，幾開胃 👍

冬蔭公海鮮意大利麵 $98 🍉🍉🍉🍉 

食得出係用泰國常用嘅香料煮嘅，但係冬蔭公味唔算太出，意大利麵闊身掛汁，煙韌彈牙，麵同海鮮嘅份量都唔算太多，有粒青口食到有沙🙈

 

青咖哩雞肉意大利飯 $90 🍉🍉🍉

雖然明白risotto係比普通飯/炒飯濕，但係睇圖都知個飯真係有啲太濕🙈 無乜creamy嘅感覺，再收多少少水會更好🙈 味道係幾好嘅，咖哩味好香，微辣唔太甜，唔會噎口，有啲似青咖哩磚嘅味道

 

安格斯西冷配炸薯條 $208 🍉🍉🍉🍉 

呢個西冷幾正，塊排幾大塊，肉味都算濃郁，咬落軟熟得嚟有咬口，一啲都唔韌

泰式奶茶拿破崙 $68 🍉🍉 

相比起之前食過嘅拿破崙，呢個價錢嚟講真係唔太大件(同埋可能個碟太大，吉位太多😂)，呢個份量可能淨係夠1個人食🙈酥皮唔算多層，微濕，cream幾輕盈但係食唔出係泰式奶茶味，最主要應該係因為無個陣香味，所以唔太吸引

牛角酥窩夫配香蕉泰式奶茶忌廉 $88 🍉🍉🍉🍉 

呢個甜品比拿破崙賣相好好多，窩夫外脆內煙韌，配埋caramalized 香蕉一齊個甜度啱啱好，如果有多球雪糕就仲正啦！

 

泰式奶茶 $26 🍉🍉🍉🍉🍉 

因為店員落單個陣講無得調校甜度，所以叫個陣都已經覺得會好甜，點知完全唔係！！茶味非常濃郁，奶味中和咗茶嘅澀味，入口非常順滑，比起一般嘅泰式奶茶，呢枝真係唔算甜， 絕對值得回購😋 (唔知有無得散買😂)

後記 

💟 餐廳氣氛同定位感覺偏向適合想一路食嘢一路傾計，順便打卡嘅食客，食物質素尚可，不過不失，唔算好出色，以餐廳位置嚟講定價略為進取，不過用餐無限時間，如果想喺元朗搵間氣氛好少少，可以坐耐啲慢慢傾計嘅餐廳就可以考慮呢間小店啦💛 

📍  Woodsage 

地址：元朗福田徑2-16號樂富大廈地下7號舖