令人想念台灣的餐廳 讚好台灣
最近每個禮拜都有一日會去黃埔附近食嘢，今日首先為大家介紹吓一間CP值幾高嘅台灣餐廳!😝
(其實之前已經去過一次，不過當時無寫食評，衣家補番😊)
肉燥三寶湯麵 (麻辣湯) ⭐️⭐️⭐️
感覺係清湯+10羹麻辣油，麻辣味好足，麻得嚟辣度適中，但係食完之後成個口都係麻辣味，食其他嘢都係辣油味三寶包括：一條台灣腸、貢丸花枝丸各兩粒
花枝丸食落有咬口，但唔算好多花枝粒﹔貢丸食落好香，除咗湯嘅麻辣味都仲食到有丸味
本身預期應該係半條台灣腸切片，無諗過會有原條台灣腸，同小食拼盤嘅一樣，正正常常，無咩特別 (P.S. 之前去試過佢咃嘅紅燒牛肉麵，係好食嘅，牛肉份量多，湯底濃味，比麻辣湯更好食)
魚酥皮蛋豆腐 ⭐️⭐️⭐️⭐️
喺皮蛋面嘅魚酥偏少，亦有少量係隻碟度，點知一入口非常濃味，濃到有少少蓋過皮蛋味，一食完超想去台灣淡水掃手信T T
皮蛋有少少雪花喺外層，蛋白膠膠地個個部份好彈牙，如果要比較就大約係平時羅X臣整嘅三層啫哩糖啱啱喺雪櫃落出嚟個種程度，蛋黃都唔會一夾散開哂，如果咁啱個嚿皮蛋上面嘅魚酥比較少就會食到皮蛋味
豆腐比較大嚿，一嚿要分開幾次夾，一大力夾起好易散哂，無乜豆味，不過雪得好凍有加分
路邊攤拼盤 ⭐️⭐️⭐️
鹽酥雞：一口雞件嘅大細，炸衣皮薄，入口無乜雞味，比較多椒鹽味，幾惹味，會想一嚿接一嚿咁食落去台灣腸：只有半條，切開三片， 比預期中少，同麵入面嘅一樣，應該都係現成嘢，無咩特別
炸花枝丸：炸衣薄，但都幾鹹，係三款小食中最重口味
蜂蜜綠茶 (自選：少冰)
1/5杯係蜂蜜，攪極都攪唔勻，成杯都淨係飲到蜂蜜味，無茶味，微加分嘅叫咗少冰，真係有少咗一半冰😂
後記
食完之後想去洗手間，侍應姐姐們都好熱情咁話無問題啦/去得叫你，仲有位姐姐係我入去廁所之前瘋狂噴完消毒先俾我入去，不過差少少以為自己會係入面被毒死😂😂😂
另外就係，去食嘢當晚咁啱見到Kiki & May都係同一間餐廳，好彩嘅係佢地條片見唔到我哋，哈哈
分享完畢
0 comments