[香港/連鎖] 新品試伏 好有驚喜嘅 すき家 Sukiya

到今時今日，要去食呢間日本連鎖牛丼店都係要排隊，可見香港人有幾鐘意日本嘢😗最近經過見出咗新嘢，又唔係太多人排隊，就決定咗入去試伏，叫咗個蘑菇多蜜醬牛丼(大)同牛肉壽喜燒鍋😊

蘑菇多蜜醬牛丼(大)  💜💜💜

宣傳海報上見到係用蕃茄、蔬菜、紅酒等去煮成嘅多蜜醬，食落其實同普通紅酒燉牛肉嘅汁係九成似，就咁睇個醬應該都係用茄膏整嘅，牛肉都無咩期待會好好食咖啦，不過不失咁啦，飯就梗係用日本米，細細粒，入口又有米香又好咬😊

我哋加咗$10轉套餐，會有埋沙律同嘢飲/麵豉湯，我哋選擇咗冰紅茶，首先食沙律附上枝裝嘅芝麻醬對我嚟講真係大加分，一嚟唔洗擔心唔夠醬，二嚟我可以用埋嚟食壽喜燒鍋😊😊😊而冰紅茶就係「午後紅茶」+糖糖糖漿嘅感覺，可以話係將日本當地飲開嘅紅茶味搬埋嚟香港😂

牛肉壽喜燒鍋 💜💜💜💜

佢個湯底唔似平時超級市場現成一枝買番嘅醬油湯，感覺上似再有另外調味(可能係味醂落多少少?)，又濃又惹味，我非常鐘意，好有驚喜！而餸就正常發揮啦，嚟得呢間都無預計啲料係有幾高質，除咗鍋入面嘅料之外，另外仲會有一細兜生菜，我自己就放埋落去煮嘅，不過唔知係咪真係suppose咁食😂

因為本身個鍋已經有個烏冬，所以一開頭我無估到佢碗飯都仲會咁大碗，無叫到少飯🙈點知一嚟到成大碗飯，最後要靠湯底撈飯先食到1/4碗🙈$60有呢個質素+份量，真係超級抵食，天氣再凍少少一定會再去食多幾次！！

後記

💟食壽喜燒鍋嘅時候要留意火嘅大細，因為佢原本有嘅湯唔多，如果長期都開大火會好快就無哂湯同痴底

💟都係嗰句啦，大家都知呢間係連鎖嘅日本平民食堂，所以店員啲動作全部都係以快為主，所以係服務態度方面就建議大家唔好咁執著啦

すき家 Sukiya (黃埔店)

地址: 紅磡黄埔天地時尚坊（第2期）地下G6B號舖