[香港/屯門] 期待以上 但仍有美中不足嘅木玥巷

推薦指數：💜💜💜💜

介紹咗咁多間九龍嘅餐廳，係時候介紹番間喺大西北咖啦😋😋今日想同大家分享嘅係位於屯門紅橋附近新開嘅「木玥巷」，餐廳定位比較新穎，提供日本菜同台灣菜，但唔係fusion，目前都仲係試業期間，本身去之前都無乜好大期望，雖然都仲有少少美中不足，但都比預期中好😝

五目魚餅 💜💜💜

到訪當日店員話五目魚餅轉咗做甜不辣，我哋無乜所謂所以就照叫咗。一嚟到見到有3嚿都幾驚喜，以為會得2嚿，食落好有咬口，好彈牙，同平時係街食甜不辣係會一pat好淋嘅魚漿唔同，另外個醬係甜酸醬，入口到差唔多吞個陣啲辣味先會湧出嚟，有少少似韓國辣炒年糕個醬咁，點落塊魚餅食好夾、好開胃。😆

汁燒牛板腱串 💜💜💜💜💜

嚟到嘅時候見到串牛仲有少少血，又無燶，已經非常加分，個汁係日本燒肉汁，唔係太甜但都唔算特別，串牛非常嫩滑，唔「UN」，雖然燒肉汁都好濃味，但食落都會有牛味，同出面嘅日式串燒店有得揮！雖然價錢要廿幾蚊一串，但考慮埋師傅燒嘅時候嘅辛苦同心機，其實值咖😋

(P.S. 我哋食嘅時候見到隔離枱叫咗燒菠蘿，好香，望落唔會燒到乾哂，覺得都可以試吓！)

木玥招牌水果茶 💜💜💜💜

入座個陣見到基本每枱都有杯好大杯嘅野飲，問完店員就決定叫呢杯水果茶😆 (招牌係西柚味，黃金係菠蘿味)

同大部份水果茶一樣，都係橙汁味最出，西柚味比較少，茶味/香都偏少，唔會好酸但唔會好甜，冰底偏多，覺得可以少番啲啲冰😛

蟹肉明太子炒新竹米粉 💜💜

因為前面兩款小食都比預期中出色，所以對主食個期待都高咗，原本係想食慢煮雞胸沾麵嘅，但可惜到訪當日無得食，就改咗叫呢個係Menu推介嘅新竹米粉，份量比想像中細碟，同埋可能因為隻碟嘅花紋，覺得好似屋企整嘅家常便飯咁，同之前嘅小食有啲對比，味道其實OK嘅，蟹味好香，米粉唔會炒燶哂，但係以$88嚟講性價比唔太高🙈🙈

後記

💟試業期間，7點半前埋單有8折優惠，如果想試嘅就建議大家book位先啦，因為聽店員講都幾full booking咖😋

💟如果無book位，去到就記得喺門口張紙度寫低名同電話，有位嘅時候店員就會打俾你咖啦

💟喺我哋等位期間，因為Keep住都係俾book咗位嘅客人入座先，有等位嘅客人唔係好滿意呢個安排，向店員投訴，店員回應嘅態度非常有禮貌同有耐性，呢方面做得幾好

木玥巷

地址: 屯門井財街7號力生大廈地下4-5號舖