[香港/中環] 估唔到中環都有高性價比嘅台灣菜 大呷台灣

推薦：🍉🍉🍉🍉 (4/5)                           味道：🍉🍉🍉🍉  (4/5)           

價錢：🍉🍉🍉 (3/5)                                打卡：🍉🍉🍉  (3/5)                       

位置：🍉🍉🍉🍉 (4/5)                           回訪：🍉🍉🍉🍉 (4/5)        

皮蛋肉鬆拌豆腐 $48 🍉🍉🍉🍉

豆腐唔重豆味，不過幾滑，有啲似百X豆腐😂個醬都係不外乎蠔油、糖同醋，我覺得惹味得嚟之餘唔會太鹹太「流」，加埋啲整碎咗嘅皮蛋，每一啖都可以食到豆腐+皮蛋，非常開胃! 而且醬汁份量足夠，食哂啲豆腐都仲有汁淨😛肉鬆都幾多，美中不足嘅就係肉鬆唔太散，每啖都係一嚿咁食落去，唔係散開嘅肉鬆

小籠包 $18 🍉🍉🍉🍉🍉

你無睇錯，真係$18，原價$38 (其實都唔貴)，衣家某啲時段特價，呢個價錢食到小籠包，點都要叫嚟試吓😋頂端埋口個位塊皮都幾厚，不過下面包住嚿肉個部份就薄嘅，唔會太粉，咬開之後啲湯啱啱好係一個匙羹嘅份量，都幾多湯😋裡面嚿肉都幾實淨，一口size得嚟連埋啲湯一齊倒落口就啱啱好! 整體嚟講佢唔算非常出色，但係以呢個價錢嚟講真係好抵食😂下次再嚟嘅話要叫1人1籠先得😛

香炸蚵仔酥 $68 🍉🍉🍉🍉

本身其實想叫蚵仔煎，即係似煎蠔餅嘅嘢，但係落單個陣叫錯咗，嚟到見到一粒粒蠔仔分開先發現😂😂新鮮炸起熱辣辣到枱，炸粉完全唔厚，只係薄薄一層，就咁夾起都會透透哋見到蚵仔肉，一咬落去蚵仔會爆汁出嚟 (所以要小心辣親😂)，超正! 外層嘅椒鹽粉都幾平均，唔會有啲好鹹有啲無味，食咗咁多粒都無腥/有沙，都幾驚喜😍

干貝蔥油雞排乾拌麵 $98 🍉🍉🍉🍉

一嚟就見到超足料嘅干貝😍本身以為只會就咁灑少少係面，望落都有一匙羹咁多😋基本上碗麵嚟到已經撈勻咗汁同麵，唔洗自己撈，賣相超吸引😛雞排就貫徹台灣嘅炸雞排特色 - 超大塊，炸衣無坊間嘅台灣菜餐廳炸得咁厚，不過都有少少會一夾就散開，食得出肉係有醃過先再炸，肉質我覺得一般，偏淋(可能醃過龍(?))🙈面頭嘅椒鹽令到雞排更加惹味之餘又唔會太鹹，加分😋

另外仲有碗湯跟埋，不過我無乜飲過😂😂

📍 大呷台灣

地址：中環威靈頓街112-114號新威大廈地下A號舖